ភ្នំពេញ៖ ប្រធានគណៈមេធាវីលោក លី ច័ន្ទតុលា បានអបអរសាទរដល់មេធាវីចំនួន៣៣រូបដែលត្រូវបានសមាជិកបោះឆ្នោតជ្រើសតាំងជាក្រុមប្រឹក្សាគណៈមេធាវីអាណត្តិថ្មី។
ក្នុងមហាសន្និបាតលើកទី២៦របស់គណៈមេធាវី និងការបោះឆ្នោតជ្រើសរើសសមាជិកក្រុមប្រឹក្សាគណៈមេធាវីអាណត្តិទី១០ ប្រធានគណៈមេធាវីលោក លី ច័ន្ទតុលា សង្ឃឹមថាក្រុមប្រឹក្សាថ្មីទាំង៣៣រូបនឹងគោរពបានខ្ជាប់ខ្ជួនតាមការសន្យារបស់ខ្លួនក្នុងកិច្ចការជួយដល់គណៈមេធាវីឱ្យរីកចម្រើន ដោយលោកបានប្រកាសសហការជាមួយសមាជិកគណៈក្រុមប្រឹក្សាដើម្បីឧត្តមភាពនិងកិត្យានុភាពនៃវិជ្ជាជីវៈមេធាវី។
មេធាវី លី ច័ន្ទតុលា លើកឡើងថា៖ «ខ្ញុំសូមចូលរួមអបអរសាទរចំពោះសមាជិក ក្រុមប្រឹក្សាគណៈមេធាវីអាណត្តិទី១០ ទាំង៣៣រូប។ ខ្ញុំបានត្រៀមខ្លួនរួចរាល់ហើយដើម្បីសហការជាមួយពួកគាត់ដើម្បីឧត្តមភាពនិងកិត្យានុភាពនៃវិជ្ជាជីវៈមេធាវីរបស់យើង» ។
រដ្ឋមន្ត្រីក្រសួងយុត្តិធម៌លោក កើត រិទ្ធ បានអបអរមេធាវីជ័យលាភីទាំង៣៣រូប និងសង្ឃឹមថាក្រុមប្រឹក្សាថ្មីនៃគណៈមេធាវីនឹងបន្តធ្វើកិច្ចការបន្ថែមទៀតដើម្បីជោគជ័យដល់គណៈមេធាវីក៏ដូចជាជួយដល់ការកសាងដល់យុត្តិធម៌នៅប្រទេសកម្ពុជាផងដែរ។
លោករដ្ឋមន្ត្រីលើកឡើងថា៖ «មេធាវីគឺជាតួអង្គដ៏សំខាន់ដែលមិនអាចខ្វះបានមួយក្នុងចំណោមតួអង្គផ្សេងទេក្នុងវិស័យយុត្តិធម៌ដែលមានបេសកម្មក្នុងការពង្រឹងនីតិរដ្ឋ ការពង្រឹងយុត្តិធម៌សង្គម ក៏ដូចជាការពារសិទ្ធិរបស់ពលរដ្ឋក្នុងនីតិវិធីផ្សេងទៀតនៃតុលាការផងដែរ» ។
ការបោះឆ្នោតក្រុមប្រឹក្សាគណៈមេធាវីកាលពីថ្ងៃទី១៨ ខែតុលា ត្រូវបានបោះឆ្នោតដោយសមាជិកគណៈមេធាវីចំនួន ២០១១នាក់តាមការបោះឆ្នោតដោយផ្ទាល់និងផ្ទេរសិទ្ធិ ខណៈដែលមេធាវីមានសិទ្ធិបោះឆ្នោតមានត្រឹមតែ២០៩៧នាក់៕
